Ертіс ауданындағы №4 орта білім беру мектебінде «Ауылдық жерлердегі тірек мектептердің әлеуетін дамыту» жобасының аралық нәтижесі таныстырылды. Шараға жоба демеушілері «Қазақстан халқына» қоры мен AITAS холдингі, жобаның бас серіктесі НЗМ өкілдері, Ауылдық аймақтарды тұрақты дамыту қорының басшысы Ксения Верба, Ертіс ауданының әкімі Болатбек Шәріпов, білім басқармасы бастығының орынбасары Роза Ақанова, аймақтық және облыстық БАҚ пен жергілікті белсенді азаматтар қатысты. «Ауылдық жерлердегі тірек мектептердің әлеуетін дамыту» жобасының негізгі мақсаты – НЗМ әдістемесі мен тәжірибесін енгізу арқылы ауыл мектептеріндегі білім сапасының деңгейін көтеру. «Бұл мектептің ұстаздары Семей қаласында өткен үш күндік курсқа қатысты. Бұдан бөлек, №4 орта білім беру мектебі мұғалімдерін Павлодардағы НЗМ тағылымдамасынан өткізетін жоба басталды», — деді Данияр Тоқтарбаев. Екі-ақ ай уақыт ішінде жоба аясында мектептің материалдық-техникалық базасы жаңартылды. Нақты айтқанда, 34 кабинет жабдықталып, STEM-зертхана, арт және телестудия ашылды, сондай-ақ хореография залы пайда болды. Осы жұмыстарды жүзеге асыру үшін жоба демеушісі «Қазақстан халқына» қоры 249 825 000 теңге қаражат бөлді. «Бүкіл республикалық ауылдық аймақ бойынша17 тірек мектепті жабдықтаймыз деп отырмыз. Бұл білім мекемелері кейін өздеріне жақын орналасқан шағын жинақты мектептерге қолдау көрсетіп, олардың дамуына үлес қоса алады. Мақсатымыз – ауыл оқушыларына білім алу мен тұлға ретінде қалыптасу жолында жайлы әрі қолайлы жағдай жасау», – дейді «Қазақстан халқына» қорының ресми өкілі Диас Бейсенбек. Білім беру саласын тұрақты дамыту қорының басшысы Данияр Тоқтарбаев демеушілер мен серіктестерге жобаға деген сенім мен бірлесіп атқарған жұмыс үшін алғыс білдірді.