Назарбаев Зияткерлік мектептерінің Педагогикалық өлшеулер орталығы «Ауылдағы тірек мектептердің әлеуетін дамыту» жобасына қатысушы мектептердің оқу жетістіктеріне мониторинг жүргізе бастады. Оған еліміздегі 63 тірек мектептің 9 мыңнан астам оқушысы қатысады. 4 және 8 сыныптарының негізгі оқу пәндері бойынша жүргізілетін сырттай бақылау 16 қазаннан 24 қазанға дейін жалғасады.
Мониторинг нәтижесінде әрбір мектепке жеке есеп дайындалып, арнайы ұсыныстар беріледі.
«Ауылдағы тірек мектептердің әлеуетін дамыту» – «Қазақстан халқына» қоры, AITAS холдингі, «Назарбаев зияткерлік мектептері» ДБҰ және Білім беру саласын тұрақты дамыту қорының бірлескен жобасы. Жоба мектептердің педагогикалық мамандарын даярлау мен ондағы материалдық-техникалық базаны жабдықтау арқылы қала мен ауыл мектептері арасындағы білім сапасының алшақтығын азайтуды көздейді.