«Ауыл мектебі» фотокөрмесі – Түркістанда!
27-қараша күні Түркістан қаласындағы «ÓzgeEpic» креатив хабында ауылдағы білім ошақтарының тыныс-тіршілігіне арналған «Ауыл мектебі» фотокөрмесінің салтанатты ашылу рәсімі өтеді. Бұл көрме шалғай ауылда орналасқан бір мектептің өмірі мен өзгерістерін сипаттайды. Фотокөрме осыған дейін Астана жұртшылығына таныстырылған болатын.
Көрменің басты идеясы – ауыл мектептеріндегі жаңашыл бастамаларды көрсету. Фотокөрме өңірлердегі білім ошақтарының жаңа технологияларды игеруін, бәсекеге ұмтылысын, елдімекеннің дамуына тигізген әсері мен жергілікті тұрғындардың болмысы мен күнделікті тіршілігін айшықтайды.
Фотокөрме «ÓzgeEpic» креатив хабының бастамасымен және ұйымдастыруымен және Білім беру саласын тұрақты дамыту қоры (furo.kz) қолдауымен жүзеге асты. Атап өтерлігі, Білім беру саласын тұрақты дамыту қоры елімізде ауыл мен қала мектептеріндегі білім сапасы теңсіздігін азайтуға бағытталған жобаларды іске асырады.
Жоба кураторы – Тоғжан Құрманжанқызы. Жобаға танымал фотосуретшілер Әйгерім Бегімбет және Сәбина Әбдімәлік шақырылды.
Әйгерім Бегімбет – журналист әрі фотосуретші. «100 жаңа есім» жобасының жеңімпазы. “Үркер” ұлттық сыйлығының лауреаты. “Тіршілік”, “Түркістан әйелдері” фотокөрмелерінің авторы.
Сәбина Әбдімәлік – суретші-фотограф. Фотожұмыстары Алматы, Атырау, Астана қалаларында қойылған. Сонымен бірге “Түсте” жеке фотокөрмесі өткен. Фотоөнермен қатар, деректі фильмдер түсірумен айналысады.
Көрме барысында фотосуретшілер шығармашылық ойларын ортаға салып, көрменің бірнеше кейіпкерін таныстырады. “Ауыл мектебі” – шалғайдағы білім беру мекемелерінің зияткерлік әлеуетін көпшілікке танытуға, сондай-ақ ауыл мектептері мен оқушыларының дамуына жаңа серпін беретін бірегей шығармашылық жоба.
Өтетін орны: «ÓzgeEpic» креатив хабы, Түркістан қаласы, 160 квартал, 252А
Өтетін уақыты: 27 қараша, 16:00
Қосымша ақпараттар үшін: +7 777 563 1002 Манижа Муминова
Мен үшін білім саласы жай ғана қызметтің бір бағыты ғана емес, бұл тамыры тереңде жатқан менің жеке тарихым. Менің атам Шығыс Қазақстан облысы Катонқарағай ауданындағы алғашқы ұстаздардың бірі болса, ата-анам да саналы ғұмырын ұстаздыққа арнады. Тағдырыма ұстаздық жолын жалғастыру жазылмаса да, білім саласын дамытуға үлес қосуға деген ұмтылыс генетикалық жадымда сақталып қалғандай.
Білім – қоғамның болашағын құрайтын іргетасы. Бұл саладағы заманауи үрдістер әр оқушының қажеттіліктерін ескеретін білім беру ортасын құру мақсатында цифрландыру мен гуманизацияға бағытталған. Цифрлық технологиялар жаңа мүмкіндіктерді ашады, оқытуды қолжетімді және жан-жақты етеді, балаларды селқос білім алушылардан оқу үдерісінің белсенді қатысушыларына айналдырады.