Катонқарағай оқушылары халықаралық фестивальде ағылшын тілінде қызмет көрсететін еріктілер атанды.

«Алтай – түркі әлемінің алтын бесігі» фестивалі барысында Шығыс Қазақстан облысы Катонқарағай ауданындағы С. Ластаев атындағы мектептің 13 оқушысы шетелдік қонақтарға іс-шара өтетін орындарда бағыт-бағдар беріп, фестиваль бағдарламасымен танысуға көмектесті. Оқушылар ағылшын тілі пәнінің мұғалімі Майкл Секарро Напалмен бірге туристермен ағылшын тілінде сөйлесіп, олардың сұрақтарына жауап беріп, қажетті орындарды табуға жәрдемдесті. Қонақтар еріктілерді оңай тануы үшін оқушылар «I speak English» («Мен ағылшын тілінде сөйлеймін») деген жазуы бар футболкалар киді. Бұл бастама шетелдік қонақтар үшін маңызды қолдау болса, ауыл оқушыларына ағылшын тілінен алған білімдерін іс жүзінде қолдануға, тілдік кедергіні еңсеруге және халықаралық қарым-қатынас тәжірибесін жинақтауға мүмкіндік берді. Майкл Секарро Напал — ағылшын тілін оқыту саласында он жылдан астам тәжірибесі бар педагог. Бұған дейін ол Сауд Арабиясы мен Филиппинде сабақ берген, сондай-ақ Жапония мен Қытайдан келген студенттерге қашықтан білім берген. Бүгінде С. Ластаев атындағы мектепте ағылшын тілінен сабақ берумен қатар, жоғары сынып оқушыларын IELTS және TOEFL халықаралық емтихандарына дайындайды, STEM бағытында сабақтар өткізеді, пікірсайыстар мен театрландырылған қойылымдар ұйымдастырады. Педагог Катонқарағай ауданында Білім беру саласын тұрақты дамыту қоры жүзеге асырып жатқан «Ауыл балаларына арналған ағылшын тілі» жобасы аясында жұмыс істейді. «Оқушылар өз ауылының елшілеріне айналып келеді. Ал бұл бағдарлама жастарға жаңа мүмкіндіктер ашып, Катонқарағайдың қонақжайлық дәстүрін нығайта түседі», — деп атап өтті Майкл Секарро Напал. Оқушылардың фестивальге қатысуы шет тілін үйренудің мектеп қабырғасымен ғана шектелмейтінін көрсетті. Мұндай тәжірибе ауыл балаларының өзіне деген сенімділігін арттырып, қарым-қатынас дағдыларын дамытуға және дүниетанымын кеңейтуге ықпал етеді.